Liverpool kërkon rikthimin, Suso: Klauzola? Vullneti im është Milan

Liverpool duket se ka kthyer sytë nga Suso. The Reds kërkojnë që ta kthejnë në Anfield, por kjo gjë nuk është aspak në planet e futbollistit, të paktën për tani. Spanjolli doli hapur dhe pas shumë aludimesh dhe zërash në merkato, që nisën të bëheshin gjithmonë e më shumë insistues, i deklaroi dashuri të sigurt skuadrës së tij aktuale, Milan.

“Vetëm pak kohë më parë kam nënshkruar një rinovim të rëndësishëm, por gjithsesi kam lexuar aludime që më lakojnë për gjithçka. Klauzola, tratativa dhe zëra merkatoje. As që i mendoj, jam i përqendruar në fushë, ndërsa për të tjerat merret menaxheri im. Gjithsesi, për çdo skenar, vlen vullneti im, vetëm vullneti im. Unë për momentin dua të qëndroj te Milan. Gjithçka tjetër është vetëm thashetheme. Në lidhje me klauzolën nuk më intereson asgjë, ndërkohë që nevojitet respekt për një klub si Milan, që mbi mua ka investuar shumë”, deklaroi Suso.