PS-ja është zgjuar sot me spastrime masive. Ka qënë deputetja socialiste Elisa Spiropali, e cila ka përcjellë vendimin, pas mbledhjes së kryesisë së PS. Kryesia e Partisë Socialiste ka shkarkuar 11 drejtues të PS në rrethe për neglizhencë, mungesë organizimi, mospërmbushje detyrash e objektivash, dhe shthurje në ato degë bashkiake ku drejton opozita. Vendimi është marrë në mbledhjen e sotme të kryesisë së drejtuar nga kryetari Edi Rama.
Pas mbledhjes që zgjati më shumë se një orë në selinë rozë, zëdhënësja e Kryesisë së PS, Elisa Spiropali njoftoi shkarkimet, ndërsa shtoi se janë bërë për shkak të degradimit të marrëdhënies pushtet lokal-qytetarë. Disa nga qytetet ku janë shkarkuar drejtuesit e PS janë; Cërrik, Selenicë, Delvinë dhe Memaliaj.
Deputetja e PS tha se janë shkarkuar kryetarë degësh të PS, por nuk bëri të ditur emrat e tyre.
“Ka një degradim të marrëdhënies pushtet lokal-qytetarë, dhe po bëhet analizë e punës së drejtorëve dhe e qeverisjes në territor. Ne kemi shkarkuar kryetarë degësh të PS, por nuk e kam listën.
Ajo do bëhet prezente më vonë. Ne nuk kemi opozitë, dhe nuk mund të presim lindjen e opozitës që të vendosim gishtin në plagët e qeverisjes lokale apo qendrore ku ka nevojë për ndërhyrje. Drejtuesit politikë do të rrisin prezencën në territor”, tha ajo.
https://tiranatoday.com/kemi-ca-drejtore-rama-mban-premtimin-shkarkon-11-kryetare-te-ps-ne-rrethe/
