Kreu i grupit kriminal që ka vepruar në Shkodër, Safet Bajri, është liruar këtë të premte për 6 orë, për t’i dhënë lamtumirën e fundit të atit të tij.
Drejtoria e Përgjithshme e Burgjeve ka konfirmuar lajmin, duke sqaruar se leja e veçantë u dha pasi u mor edhe miratimi i prokurorisë për Krime të Rënda dhe asaj të Shkodrës.
Safet Bajri u nis drejt qytetit të lindjes rreth orës 10:20 të paradites së të premtes për të mbërritur në varrimin e të atit rreth orës 13.00. Ndërkohë, policia ka qëndruar në gatishmëri përgjatë 6 orëve, duke patrulluar gjithë kohës.
Mësohet se ‘i forti’ i Shkodrës është kthyer pas 6 orësh për t’u izoluar më pas në ambientet e paraburgimit 313 në Tiranës.
Safet Bajri u arrestua në shtator të 2018-ës në zonën e Xhamllikut në kryeqytet. Ai dyshohet të jetë kreu i një grupi kriminal që kryente trafik droge, vrasje dhe trukim ndeshjesh.
