Çdo tentativë e Ramës për të negociuar me studentët ka dështuar, duke dhënë një provë të fortë se ata nuk do të ndalen deri në realizimin e çdo kërkese. Dita e tetë e protestës ka nxehur edhe më shumë situatën politike, ku thashethemet e fundit flasin për një lëvizje të bujshme.
Zërat brenda protestës flasin se Ministrja e Arsimit, ndodhur përballë një furtune që nuk po i jep zgjidhje, do të japi dorëheqjen. Po të njëjtat zëra, ende jo zyrtare, i referohen faktit se çdo gjë pritet të ndodhë sot, në orën 18:00.
Kjo mbetet ende në kuadrin e thashethemeve, pasi ende nuk ka një konfirmim nga ana e qeverisë. Pritet që znj. Nikolla të thërrasë një konferencë të jashtëzakonshme për mediat, në të cilën do të komunikojë dorëheqjen e parevokueshme.
Përveç kësaj, mësohet se ministres i është dhënë një tekst prej Ramës, ku është shkruar se ajo pranon dështimin e Reformës në Arsim, si dhe mos funksionimin e universitetit dhe të konvikteve.
Kjo lëvizje nuk ka sjellë aspak eufori tek studentët, e ndërsa ata shprehen se kjo nuk ishte aspak në kërkesat e parashtruara më herët nga ana e tyre. Studentët nuk kërkojnë dorëheqjen e ministres, pasi për ta do të jetë e njëjta gjë, edhe nëse në pozicionin e saj do të vendoset dikush tjetër.
