Segmenti rrugor Lin-Pogradec, fillimi i ndërtimit të të cilit zor të mbahet mend, deri në përfundimin e tij, pritet t’i kushtojë akoma më shumë buxhetit të shtetit.
Autoriteti Rrugor Shqiptar ka hapur tenderin për ndërtimin e 17 km të mbetura të këtij segmenti, vlera e të cilit është 1 miliard lekë, pa përfshirë vlerën e TVSH.
Sipas njoftimit të Agjencisë së Prokurimeve Publike, afati i kontratës është 24 muaj, e thënë ndryshe, të paktën edhe dy vite të tjera makth për ata që përshkojnë këtë rrugë.
Projekti fillestar për ndërtimin e këtij segmenti ka pësuar një sërë ndryshimesh duke shmangur prishjen e bunkerëve, (të konsideruar nga Ministria e Kulturës me vlerë historike), futjen në liqen dhe duke shtuar një tunel.
Faza e parë e punimeve në këtë segment ka kushtuar 24 miliard lekë.
