Andi Lila në fillim deklaroi se nuk do të rinovonte kontratën me PAS Janinën dhe u largua mes lotësh për të kërkuar një aventurë të re, ndërkohë që mësohet se vetëm para disa ditësh ai ka nënshkruar një kontratë trevjeçare me këtë skuadër. Ai ka dhënë një intervistë për mediat greke, ku futbollisti i Kombëtares shqiptare të futbollit ka folur në lidhje me këtë zgjedhje.
“PAOK? Po, kam pasur ofertë interesante. Mirëpo, ishte familja ime që më bëri ta refuzoj, pasi nuk preferuam që të shpërngulemi në Selanik. Rikthimi? Këtu jam si në shtëpinë time. Kam kaluar shumë me PAS Janinën dhe kam marrëdhënie shumë të mira me drejtuesit dhe me trajnerin. Është ndërtuar një skuadër cilësore dhe do të kërkojmë që të arrijmë objektiva madhorë”, ka thënë Lila.
Sa për trajnerin e ri të Kombëtares shqiptare, ai ka thënë: “Panuçi ka qenë një futbollist me shumë eksperiencë. Kombëtarja? Kemi lojtarë cilësorë dhe shpresoj të shkojmë sërish në Europian.”
