Nesër do të shqyrtohet dekreti i ish-presidentit Nishani për ligjin e mbetjeve në Komisionin e Veprimtarisë Prodhuese.
Dekreti i Nishanit rrëzoi ligjin e mbetjeve në fund të vitit 2016, ndërsa ai është kthyer për shqyrtim në Kuvend nga ana e mazhorancës.
Kreu i Grupit Parlamentar të Partisë Socialiste, Taulant Balla, deklaroi para pak ditësh se ligji do të dërgohet për diskutim në publik, për një debat shterues.
“Nuk ka më projekt-ligj për dekoratat apo për mbetjet. Grupi Parlamentar Socialist do t’i rikthejë në publik për një debat shterues, bazuar në argumente jo në akuza dhe në arsye jo në mllef. Bashkëqeverisja me njerëzit e zakonshëm ka filluar”, shkroi Balla në një postim në Facebook.
Nga ana tjetër, partitë opozitare, Partia Demokratike dhe Lëvizja Socialiste për Integrim, kanë kërkuar një referendum për këtë ligj.
