Pas tërmetit të mëngjesit ditën e djeshme ka pasur një debat në distancë ndërmjet aktorëve politikë për shpalljen e gjendjes së jashtëzakonshme.
Mëngjesin e sotëm Kryeministri Rama ka njoftuar se në të dyja qarqet e prekura do të shpallet gjendja e jashtëzakonshme. “Do shpallim gjendjen e jashtëzakonshme bazuar në Kushtetutë. Ashtu si Kushtetuta dhe legjislacioni shtjellojnë, duke nisur nga natyra dhe perimetri i situatës do të jetë gjendje e jashtëzakonshme për dy rajonet e prekura në mënyrë të drejtpërdrejtë, Tiranën dhe Durrësin’, tha ai.
Bazuar në ligjin shqiptar, gjendja e jashtëzakonshme shoqërohet edhe me një sërë masash ligjore, të cilat KM i ka sqaruar “Nuk e di nëse janë të gatshëm ata që e predikonin gjendjen e jashtëzakonshme që tu nënshtrohen këtyre masave. Gjendja e jashtëzakonshme, për një periudhë 30 ditore, ka hapësirat dhe detyrimet për ata që duhet ta qeverisin atë. Mbase nuk do u vijë për shtat atyre që e kanë predikuar, pasi ka qenë një temë me të cilën mund të bënin politikë, pasi Shqipëria ishte në lot”, tha Rama.
Çfarë ndodh kur shpallet gjendja e jashtëzakonshme?
Neni 173 i Kushtetutës parashikon që gjendja e jashtëzakonshme vendoset nga Kuvendi me propozim të Këshillit të Ministrave, në rastet kur cënohet rendi kushtetues apo siguria publike.
Neni 174 i Kushtetutës parashikon që: “Për parandalimin ose mënjanimin e pasojave të një fatkeqësie natyrore ose aksidenti teknologjik, Këshilli i Ministrave mund të vendosë, për një periudhë jo më të gjatë se 30 ditë, gjendjen e fatkeqësisë natyrore në një pjesë ose në të gjithë territorin e shtetit.”
Çfarë do të thotë kjo për aktorët politikë dhe përplasjet aktuale President-Qeveri?
Nga ky ligj preken dy nisma të mëdha që partitë kanë ndërmarrë në kuadër të përplasjeve që kanë aktualisht.
- Që maxhoranca është e detyruar të ndërpresë të gjitha nismat ligjore për shkarkimin e presidentit deri në datën 27 dhjetor.
- Në zonat ku është shpallur gjendja e jashtëzakonshme do të ndalohen të gjitha format e tubimeve. Pra, në qarkun e Tiranës dhe Durrësit, çka nënkupton dhe ndalimin e tubimit të parashikuar nga presidenti Meta në 8 Dhjetor.
