Dhoma e Ulët e parlamentit rus, Duma, miratoi sot legjislacionin për t’u mundësuar autoriteteve të komunave të Moskës që të shkatërrojnë mijëra blloqe apartamentesh që i përkasin epokës sovjetike në të gjithë qytetin.
”Legjislacioni i diskutueshëm, i cili ka nxitur protesta të shumta, u miratua nga 399 deputetë, me vetëm dy kundërshtarë dhe një abstenim”, njoftoi media shtetërore.
Autoritetet e qytetit të Moskës kanë pohuar se blloqet e apartamenteve të ndërtuara gjatë qeverisjes sovjetike të viteve 1950 -1960, janë të rrezikshme për banorët.
Sipas autoriteteve ky ligj do të prekë rreth 1,6 milionë banorë, shkruan ATA.
Qyteti dëshiron t’i rindërtojë këto ndërtesa. Shumë banorë kanë kundërshtuar për të lëvizur nga shtëpitë e tyre .
”Të paktën 10 persona u arrestuan sot gjatë një proteste jashtë ndërtesës së parlamentit”, raportoi media lokale.
