Lewis Hamilton: Do rinovoj, jemi të etur për të fituar

Kampioni i botës në fuqi i Formula 1, ka folur për mediat 10 ditë para se të startojë sezoni i ri. Ai është shprehur se gjithçka shkon mirë mes tij dhe skuderisë Mercedes dhe shumë shpejt do të vijë edhe rinovimi. E rëndësishme është që objektivat janë të njëjta për të dyja palët që të vazhdojnë rrugën e kampionit.

“Ende nuk ka asgjë zyrtare, por përgjatë këtij sezoni do të firmos rinovimin e kontratës me makinën Mercedes. Po bisedojmë dhe klima mes nesh është e qetë, ka dëshirë nga të dyja palët për të vijuar bashkëpunimin, ndaj besoj se do të gjejmë një marrëveshje”, ka deklaruar sot piloti britanik Lewis Hamilton. Kontrata e pilotit britanik skadon në fund të këtij sezoni, por gjasat janë që ai të qëndrojë te makina gjermane edhe për dy sezone të tjera në Formula 1.

Për sa i përket sezoni që do të nisë pas 10 ditësh, Hamilton shton: “Nuk kënaqemi me kaq sa kemi arritur, pasi synojmë të jemi sërish kampion. Kemi dëshirë të vazhdojmë projektin e nisur, askush nuk do të ndalet, pasi kemi ende shumë për të arritur. E kemi çuar teknologjinë në limitet e saj, ndaj dhe kemi qenë gjithnjë lider. Kjo nuk ka qenë rastësi. Po e nis këtë sezon të ri jo me idenë që kam fituar 4 tituj kampionë bote, por me mentalitetin dhe dëshirën për të fituar ende”, tha Hamilton.