Ekspozita “Leviathan” tashmë mund ta shihni në Qendrën për Hapje dhe Dialog. Një ekspozitë aspak e zakonshme nga artisti i njohur Ergys Krisiko, nën kurimin e Ajola Xoxës, ka pushtuar hapësirat e hollit protokollar dhe të sallës “Tako Artistin”, duke e ftuar vizitorin të jetë bashkëjetues me veprën. Kjo ekspozitë do të qëndrojë e hapur për publikun deri në 15 prill 2022.
Krijesa mitologjike e Leviatanit është një përbindësh nënujor i përmendur për herë të parë në Testamentin e Vjetër Biblik.
Siç shpjegohet në tekstin kuratorial, kjo krijesë është simbol i fuqisë së madhe krijuese të Zotit, por ka edhe anën e errët. Shihet gjithashtu si një bishë demoniake dhe e aftë për të vrarë.
Artisti Ergys Krisiko, me aktivitetin e tij është i njohur dhe i vlerësuar në fushën e artit. Edhe më parë është prezantuar për publikun me punime që kanë ngjallur interes. Këtë herë ai prezanton një ekspozitë me punime në skulpturë dhe instalacion për publikun në COD, që mund ta vizitojnë deri në mesin e muajit që vjen.
