Aksidenti tragjik në parkingun e stadiumit të Leicesterit Cityt ka tronditur botën e futbollit. Në të humbën jetën presidenti i klubit Vichai Srivaddhanaprabha, vajza e tij, piloti dhe dy drejtues të Leicesterit. Kjo ngjarje i preku të gjithë për vetë faktin se Vichai Srivaddhanaprabha, shkroi histori në Premier Ligë duke u shpallur kampion me Leicesterin pavarësisht se në atë kampionat kishte ekipe si United,City, Arsenal, Liverpool apo Chelsea.
Portieri i Leicesterit, Kaspet Shmajkëll ishte ndër futbollistët që u prek më shumë nga kjo tragjedi, duke qenë se lidhja e tij me presidentin ishte e ngushtë. Ai ka shkruar një letër dedikimi për presidentin e Leicesterit, duke bërë që të gjithë te preken nga shkrimi i tij.
Letra e plotë:
“Presidenti im i dashur!
Unë nuk mund ta besoj këtë ndodhi. Jam tërësisht i shkatërruar dhe zemërthyer. Thjesht nuk mund të besoj atë që pashë mbrëmë. Ajo nuk duket e vërtetë!
Është e vështirë për ta thënë me fjalë se sa keni menduar dhe sa keni dhënë për këtë klub dhe për qytetin. Të gjithë e dimë për investimin në klubin që ju dhe familja juaj keni bërë. Ju u kujdesët kaq shumë jo vetëm për klubin, por për të gjithë shoqërinë. Kontributi juaj i pafund në spitalet dhe bamirësitë e Leiçesterit nuk do të harrohet kurrë. Keni shkuar më lart në çdo aspekt.
Kurrë nuk kam parë ndonjëherë te një njeri si ti një punë kaq të madhe, kaq të përkushtuar. Ju keni pasur kohë për të gjithë, nuk kishte rëndësi kush ishte. Gjithmonë ju kam admiruar si udhëheqës, si baba dhe si njeri.
Ju ndryshuat futbollin. Përgjithmonë! Ju i keni dhënë shpresë të gjithëve se e pamundura ishte e mundur, jo vetëm për tifozët tanë, por për tifozët anembanë botës në çdo sport! Shumë njerëz nuk e kanë bërë këtë. Kur më morët në vitin 2011 ju më thatë se do të ishim në Ligën e Kampionëve brenda 6 viteve dhe do të bënim gjëra të mëdha. Ju më frymëzuat dhe besova në ju. Ju më bëtë të ndihem sikur asgjë nuk ishte e pamundur. Pa ju dhe familjen tuaj, e gjithë kjo, gjithçka që bëmë së bashku çdo gjë që kemi arritur, kurrë nuk do të kishte ndodhur. Ju e kthyet ëndrrën time në realitet.
Por ajo për të cilën unë jam më shumë krenar është fakti që isha pjesë e vizionit tënd, e mjedisit që keni krijuar. Ky klub dhe ky qytet është një familje. Dhe kjo është e gjitha falë jush. Për këtë, unë u jam përjetësisht mirënjohës. Unë jam me fat që ju kam njohur dhe jam rritur pranë jush dhe familjes suaj të mahnitshme dhe për të gjitha momentet dhe përvojat e përbashkëta që kam pasur me ju në aspektin personal. Më thyhet zemra të di që nuk do të të shoh kurrë në dhomat e zhveshjes, kur vij herët në mëngjes dhe bisedonim për gjithçka. Nuk do të jesh aty duke u kënaqur dhe duke qeshur me djemtë dhe duke parë buzëqeshjen tuaj entuziazmin që i jep të gjithëve me të cilët keni kontaktuar.
Tani kemi një përgjegjësi si klub, si lojtarë dhe tifozë për t’ju nderuar. Do ta bëjmë duke e ditur se jemi familja që ke krijuar. Duke qëndruar pranë dhe mbështetur ata që ishin më të afërt me ju gjatë kohëve jo të mira.
Ju keni pasur një vizion për këtë klub, keni dashur më të mirën për ne. Nuk kishte absolutisht asgjë që nuk do të bënit për ne. Ishit kaq të pasionuar. Ne duhet të respektojmë trashëgiminë tuaj duke dhënë në fushë atë që ju donit. Ju kurrë nuk do ta dini se sa rëndësi keni për mua dhe familjen time. Unë jam vërtet i nderuar dhe i privilegjuar që isha një pjesë e vogël e jetës suaj”, shkruhej në letrën e portierit.
