Marek Hamsik është zyrtarisht futbollisti më i ri i skuadrës kineze Dalian Jifang dhe këtë e ka konfirmuar presidenti i Napolit, Aurelio De Laurentis që i ka uruar njëkohësisht edhe suksese ish-kapitenit napolitan. Ashtu si Maradona, edhe Hamsik tashmë konsiderohet një legjendë për klubin dhe si i tillë duhej larguar me nderime, por për këtë ka kërkuar vetë falje Hamsik.
I larguar nga Napoli me katër rekorde të mëdha, Hamsik ka shkruar fjalë zemre në rrjetin social ‘Instagram’, duke i uruar vetëm fat ish-skuadrës së tij. Hamsik është aktualisht futbollisti me më shumë ndeshje në historinë e Napolit, me më shumë ndeshje në kampionat, me më shumë ndeshje në Europë dhe golashënuesi më i mirë i të gjitha kohërave.
Letra e Hamsik:
“Së pari duhet të kërkoj falje tifozëve të kaltër: kam dashur, kam shpresuar, kam ëndërruar të them lamtumirë me një përshëndetje të madhe në fushë, i shoqëruar nga duartrokitjet tuaja. Ju më keni mbështetur dhe më keni dashur gjithmonë pa kushte, në momente të bukura ose të vështira. Unë do t’iu jem gjithmonë mirënjohës për këtë.
Napolin e kam si tatuazh në lëkurën time. Fitoren e parë në Kupën e Italisë pas 25 vjetësh. Është e pamundur të harrosh atë moment. Është e pamundur të harrohet momenti kur kam thyer rekordin e Bruskolotit ose kur kam thyer rekordin e Diego Armando Maradonës për golat. Kjo më bën jashtëzakonisht krenar. Në Napoli kanë lindur 3 fëmijët e mi, napolitanë në të gjitha aspektet.
Unë do të doja të falënderoja të gjithë, presidentin që më dha mundësinë të qëndroj këtu për 12 vite dhe që e pranoi dëshirën time për të provuar një përvojë të re, të gjithë trajnerët që më kanë stërvitur, të cilëve u detyrohem për rritjen time si lojtar dhe si njeri, të gjithë stafin mjekësor dhe teknik.
Shpresoj që sa më shpejtë të jetën e mundur, të kem shansin e fundit për të bërë një përshëndetje të madhe rrethe qark fushës së ‘San Paolos’ për të marrë përshëndetjet nga të gjithë. E dua dhe do ta dua gjithmonë këtë qytet. Shpresoj që të fitoni Ligën e Europës këtë sezon”, shkruante Hamsik në letrën e tij.
