Në intervistën e publikuar sot të Ismail Kadaresë, shkrimtari jep detaje të shumta mbi letrën e publikuar para pak ditësh.
Ndër të tjera, në këtë intervistë, Kadare tregon publikimi i letrës pas kaq shumë vitesh, është një tentativë për ta dëmtuar shkrimtari.
Kadare thotë se nuk dinte asgjë për letrën, ku ishte dhe kush e kishte në dorë, madje ai shton se nuk e mbante mend mirë atë letër.
I pyetur se kush e nxori dhe përse doli pikërisht tani, shkrimtari thotë se “kjo është një enigmë, por të shkon mendja se ka dalë direkt nga kasaforta e Enver Hoxhës, e Nexhmije Hoxhës ose e atij që e ka marrë këtë kasafortë si testament.”
-Kush e dinte ekzistencën e kësaj letre? Pse doli pikërisht tani?
Enigmë është kush e nxori. E dija vetëm unë, që e kam shkruar. Kush e nxori tani, kush e manovroi tani? Të shkon mendja se ka dalë direkt nga kasaforta e E. Hoxhës, e Nexhmije Hoxhës ose e atij që e ka marrë këtë kasafortë si testament.
-Ju prej vitesh keni kërkuar hapjen e dosjeve. Për ironi, ende pa u hapur, del një letër, që duket sikur hedh baltë mbi ju?
Jo baltë, por më keq se baltë. Është tentuar të më dëmtojnë në atë kohë, por shih, edhe tani prapë. Nuk e duan të vërtetën, nuk e do askush. Krimi i madh nuk e do të vërtetën kurrë. Unë, të mos di letrën e vetme që i kam bërë Enver Hoxhës, të mos di ku është e si del, kush e ka në dorë? Nuk më ka treguar askush deri më sot, nuk dija ku ishte. Ishte hera e parë që e kam parë, sepse ka rreth 40 vjet që është shkruar, madje nuk e mbaja mend mirë.
