Grupi i cili është ngritur kundër kreut aktual Lulzim Basha në Partinë Demokratike, zhvilloi një takim me një nga figurat historike të kësaj force politike Jozefina Topalli.
Një ndër ta është edhe anëtari i Këshillit Kombëtar të Partisë Demokratike, Leonard Olli, i cili shpjegoi në detaje të gjitha kërkesat drejtuar Topallit për Lulzim Bashën.
Në një prononcim për ‘‘Tirana Today’’, Olli vuri në dukje se grupi kërkon dorëheqjen e kryetarit të PD-së si dhe shtyrjen e zgjedhjeve brenda partisë për të bërë të mundur prezantimin e platformave nga ana e kandidatëve dhe krijimin e një gare reale për kreun e kësaj force politike.
Prononcimi i plotë i Leonard Ollit për Tirana Today:
Ajo erdhi të na takonte pas daljeve publike që ne kemi bërë. Na pyeti se cilat janë kërkesat tona. U përgjigjëm se duam një garë të barabartë dhe të rregullt, si dhe respektimin absolut të statutit si dhe marrjen e përgjegjësive. Nëse nuk ka premisa për garë atëherë ky do të ishte fundi i PD-së.
Topalli ka takuar edhe ish-grupin e deputetëve. Ndërsa në takimin me ne kërkoi një feedback se cilat ishin pretendimet tona. Ne i thamë që nuk kemi asnjë lloj pretendimi në nivele individuale. Kërkojmë dorëheqjen e Bashës, respektimin e statutit, largimin nga zyra, kalimin e kompetencave sekretarit të përgjithshëm dhe thirrjen e Këshillit Kombëtar që do të emërojë një nga nënkryetarët. Ne po ndjekim vetëm pjesën legale të kësaj situate. Nëse do Basha, që të hyjë në garë le të hyjë. Kërkuam në mënyrë absolute mospërdorimin e aseteve të PD-në për të sulmuar PD-së. Ky takim ishte për të diskutuar situatën e zgjedhjeve në parti se cilat janë shqetësimet dhe pse ne i kemi ngritur këto shqetësime, si dhe futjen e procesit në shtratin e statutit; respektimin germë për germë të neneve të Kushtetutës së partisë, me kërkesën kryesore shtyrjen e datës së zgjedhjeve me një afat normal për të bërë garë reale me paraqitjen e platformave të çdo kandidati.
