Nijas Lena pas një gjysmësezoni jo të mirë është ndarë zyrtarisht nga klubi i Teutës. Si ç’ishte paralajmëruar pak ditë më parë ai është larguar nga “Djemtë e detit”. Rezultatet e dobëta që mori Teuta deri tani bënë të paevitueshëm faktin që përveç largimit të trajnerit Gugash Magani, të kishte edhe një spastrim sa i përket lojtarëve. Në pankinën e durrsakëve u vendos Stavri Nica, ish-trajneri i Lushnjës dhe duket se në ekip nuk ka pasur më vend për kapitenin Lena.
Me durrsakët, Lena luajti 15 ndeshje nga 16 të zhvilluara në Superiore, duke shënuar dhe dy gola, një përballë Kukësit në humbjen 4-2 dhe një tjetër në fitoren 2-1 me Luftëtarin. Gjithsesi, ofertat nuk mungojnë për 31-vjeçarin, teksa disa klube të superligës kosovare kanë shfaqur interes për të, por gjithashtu edhe Vllaznia nga Kategoria Superiore. Nëse do të zgjidhte për të vazhduar karrierën e tij te shkodranët, Lena do të bashkohej me ish-trajnerin e tij te Kukësi, Ernest Gjoka, megjithatë diçka më tepër sa i përket të ardhmes së mesfushorit do të mësohet në ditët e para të janarit.
