Roberto Baggio është rikthyer sërish në qendër të mediave italiane, por këtë herë jo për atë që di të bëjë në fushën e futbollit. Ai është paraqitur në Pallatin e Drejtësisë të Venecias, ku ka dërguar në gjykatë Paolo Mocavero, aktivistin e shoqatës “100% Animalisti”, me akuzën se e ka quajtur “budist me pushkë”, dhe se e ka etiketuar si injorant. Baggio dukej mjaft i qetë për veprimin që po bënte, saqë ka ndaluar dhe është fotografuar me fansat e tij.
Aktivisti kishte shkruar një postim shumë të rëndë kundër ish-bomberit: “Baggio, që ka kurajon të vetëquhet “budist” (me siguri, për shkak të nivelit të tij kulturor, nuk e njeh kuptimin e fjalëve) pasi ushtron gjahun, duke udhëtuar në perëndim për ato udhëtime famëkeqe të vdekjes”. Një mesazh që nuk kaloi pa u vënë re nga ish-kampioni. Ky i fundit vendosi të denoncojë aktivistin për prishje të imazhit dhe shpifje.
