Legjenda e futbollit argjentinas, Diego Maradona ka dhënë dorëheqjen si trajner i klubit meksikan të kategorisë së dytë, Dorados për arsye shëndetësore.
Këtë vendim e ka bërë të ditur avokati i trajnerit, Matias Morla, i cili u shpreh se Maradona e ka marrë këtë vendim nën këshillat e mjekëve të tij, për t’i kushtuar më shumë kohë shëndetit të tij.
Ai ka vendosur të mos vazhdojë në pozicionin e tij si menaxher i Dorados. Nën këshillat e mjekëve të tij, ai do t’i nënshtrohet dy operacioneve: për shpatullën dhe gjurin e tij, shkruan avokati Matias Morla në Twitter.
Maradona mori detyrën e trajnerit të Dorados, në shtator të vitit 2018, ekip me të cilin shkoi dy herë në finalen e titullit. Të dyja herët, Dorados dështoi përballë Atletico San Luis, i cili u ngjit në elitën e futbollit të këtij vendi.
Shumë njerëz e kritikuan vendimin e kampionit të ‘Kupës së Botës 1986’, i cili ka luftuar publikisht varësi të ndryshme, se pse donte të shkonte në një vend më shumë të njohur për drogën se sa futbollin.
Para se të merrte “timonin” e Dorados, Maradona kishte drejtuar katër klube të ndryshme si trajner: Mandiyu de Corrientes, Racing Club, Al Wasl dhe Fujairah FC.
Roli i tij më i famshëm si trajner ishte kur mori përsipër drejtimin e ekipit kombëtar argjentinas në periudhën 2008-2010.
Maradona është shprehur më herët këtë vit se ai kishte planifikuar të largohej nga klubi në fund të sezonit të pranverës, duke pretenduar se gjyqtarët e ligës ishin kundër tij.
