Barcelona duket se e ka humbur “fillin” në La Liga. Pasi e ndaloi Girona një javë më parë, tani është Leganes që i shkakton humbjen e parë. Një ndeshje që është vendosur në harkun e 68 sekondave dhe ka përfunduar në 2-1. Ndeshja e 700-të e Messi-t do të mbahet mend si triumfi historik i Legane-s.
Katalanasit e nisin mjaft mirë dhe është Phelippe Coutinho që shënon një gol spektakolar. Braziliani dhuron spektakël nga jashtë zone, ku pasi e stopon topi e godet fluturimthi dhe përfundon në rrjetë. Të besuarit e Valverdes dukej se do të kishin një mbrëmje të lehtë dhe do të argëtoheshin, por pas golit luajnë të tërhequr dhe me shumë pasime në mesfushë.
Leganes përmbys rezultatin brenda 68 sekondave duke befasuar botën e futbollit. Ishte El Zhar ai që barazon rezultatin, dhe pas një minute ishte gabimi trashanik i Gerard Pique që i dha mundësinë vendasve të kalonin në avantazh. Barcelona mundohet të reagojë por mundësitë për gol mungojnë.
Lojtarët e Leganes luajnë me zemër dhe vetëm në 10 minutat e fundit miqtë arrijnë të rrezikojnë seriozisht portën e tyre. Në fillim ishte Coutinho, pastaj Rakitic, por goditjet e tyre priten mrekullisht nga portieri Cuellar.
