Koalicioni Nisma-AKR që drejtohet nga Fatmir Limaj ka kërkuar rinumërim të votave. Deri tani ky koalicion ka marrë 39 mijë e 173 vota ose 4,93%. Për një numër të vogël votash nuk po arrin të kalojë pragun prej 5 %.
Po ashtu, numërim të votave në nivel vendi ka kërkuar edhe Lidhja Demokratike e Kosovës, shkruan “gazeta express”.
Sakaq, ka reaguar zyrtarja e Lëvizjes Vetëvendosje, Albulena Haxhiu, e cila tha se rinumërim po kërkojnë subjektet të cilat nuk kanë marrë mbështetje nga qytetarët dhe po kërkojnë që të gjejnë shpëtim.
Sipas Haxhiut, përkrahësit e Vetëvendosjes nuk duhet të shqetësohen pasi në qendrat e numërimit kanë personat përgjegjës që do të ruajnë vullnetin e qytetarëve.
“Që nga mëngjesi, kam pasur shumë mesazhe dhe telefonata nga qytetarë, miq e familjarë. Janë të shqetësuar lidhur me ndonjë tendencë për manipulim votash pas kërkesës për rinumërim. Qëndroni të qetë, mos u shqetësoni. Ne kemi personat përgjegjës që janë gardianët e vullnetit të qytetarëve. Padyshim subjektet që nuk kanë marrë mbështetjen nga qytetarët, tentojnë të gjejnë shpëtim nga rinumërimi. Qytetarët kanë folur me 6 tetor.Vullneti i tyre do të jetësohet”, shkruan Haxhiu.
