Gazetarja Klodiana Lala, ka folur në emisionin ‘Opinion’ lidhur me ngjarjen e rëndë, ku shtëpia e saj u sulmua me armë zjarri.
Lala tregoi se si e mësoi sulmin me armë në banesën e prindërve ku ndodheshin dy vajzat e mitura dhe familjarët e saj. Ajo shpjegoi se e sulmuan në shtëpinë e prindërve sepse vetëm aty autorët e sulmit mund të largoheshin me lehtë dhe pa lënë shumë gjurmë.
Gazetarja shpjegoi se te banesa ku jeton me bashkëshortin është në katin e fundit të pallatit dhe se e gjithë zona ku ajo banon është e rrethuar nga kamerat e sigurisë, kurse banesa e prindërve nuk ka asnjë kamera sigurie afër.
Lala tha se ngjarja ka ndodhur rreth orës 03:00 të mëngjesit, ku u lëshuan breshëri plumbash në banesën e prindërve.
Ajo tha se banesa është qëlluar me 15 plumba, ku predhat janë gjetur në mjediset e banesës. Lala tregoi se dy plumba kanë depërtuar në dhomën ku po qëndronin dy vajzat e saj.
Në lidhje me arsyet e sulmit, gazetarja tregoi se për të shkatërruar një gazetar, hapi i parë është që të trembin gazetarët përmes sulmit ndaj familjarëve.
