Gazetarja Klodiana Lala ka dhënë detaje të reja lidhur me personin e shpallur në kërkim, pronar të “Arbri Garden”, pas sekuestrimit të 613 kilogramëve kokainë.
E ftuar në emisionin “Opinion”, me temë “Kush fshihet pas 180 milionë eurove drogë?”, gazetarja tha për biznesmenin Arbër Çekaj se ka ndryshuar mbiemrin pas ardhjes nga Tropoja në Tiranë dhe se droga është identifikuar ende pa ardhur në Itali.
“Droga është identifikuar para se të vinte në Itali. Itinerari ka qenë Kolumbi-Itali- Maltë – Durrës. Është porositur nga kompania “Arbri Garden” me administrator të vetëm Arbër Çekaj, i cili pjesën më të madhe e kalon në Gjermani.
Arbër Çekaj është me origjinë nga Tropoja dhe mbiemrin e tij të origjinës e ka Kuliçi në vitin 1990 familja ka lëvizur nga Tropoja dhe ka ardhur në Manzë, xhaxhai i Arbër Çekajt një ish-gjykatës shumë i njohur bashkë me babanë dhe xhaxhanë tjetër kanë vendosur të ndryshojnë mbiemrin,” tha Lala.
Më tej gazetarja ka thënë se një vit më parë kanë tentuar të ekzekutonin kreun e grupit.
“Policia e shtetit ka identifikuar të paktën dy grupe kriminale njëri prej të cilëve vepron në zonën e Manzës dhe një tjetër në Shijak për të cilën policia është duke i monitoruar. Burime dhe informacione thonë se kanë shumë mbështetje të fortë në politikë. Grupi që vepron në zonën e Manzës është në një përplasje të fortë me një grup nga Shijaku dhe ka pasur tentativa për të eliminuar. 17 grupe kriminale janë me rrezikshmëri të lartë. Grupi që vepron në zonën e Manzës një vit më parë në afërsi të stadiumit Dinamo që është duke u verifikuar, është tentuar që kreu i grupit të ekzekutohet një vit më parë,” tha Lala.
