Mark Frroku është shpallur i pafajshëm për vrasjen në Belgjikë, ndërsa është dënuar me 7 vite e 6 muaj burg për pastrim parash, për fshehje të pasurisë dhe për ndërtim pa leje.
Gjykata e Krimeve të Rënda dha sot vendimin për ish-deputetin, në mungesë të të pandehurit, ndërsa Prokuroria kishte kërkuar 25 vjet burg për Frrokun.
Avokati i ish-deputetit e cilësoi si një fitore faktin që Frroku nuk u dënua për vrasje, ndërsa vendimin mbi dënimin për pastrim parash, fshehje të pasurisë dhe ndërtim të paligjshëm, ai e quajti si jo të drejtë.
“Gjykata e Krimeve të Rënda nuk ka vepruar drejt. Nuk kishte prova për vrasjen, ishte një akuzë e ngritur mbi bazën e thashethemeve. Është një fitore që nuk u dënua për vrasje. Ne do ta apelojmë vendimin në Gjykatën e Apelit”, tha avokati i Frrokut.
