Duhet të kalonin 14 javë që Skënderbeu të pësonte humbjen e parë na kampionat dhe ia shkakton pikërisht Laçi. Ndeshja u fiksua që në starti e pjesës së dytë ku beratasi Uzuni mposhti Shehin me një goditje nga jashtë zone. Kjo ishte një mundësi mjaft e mirë për korçarët që të thellonin diferencën me ndjekësit por nuk e shfrytëzuan dot. Nga ana tjetër Laçi me Mezanin në stol është bërë një ekip më solid dhe më kërkues, duke marrë aktualisht vendin e pestë me 21 pikë.
Ndeshja u dominua nga korçarët por sulmi nuk ishte në ditët më të mira. Rastet më të rrezikshme para portës ishin për kurbinasit, por Shehi nuk lejoi të shkojë topi në rrjetë në të parë. Në fillim të së dytës Uzuni godet mjaft mirë nga jashtë zone dhe topi prek shtyllën për të përfunduar në rrjetë. Daja hedh në fushë Sowen, Shkodrën dhe Lulajn për të freskuar ekipin që ndjeu lodhjen nga angazhimi që kishin pak dit më parë në Europa League, por sërish nuk arritën të ndryshonin fatin e ndeshjes.
Në sfidën tjetër të zhvilluar në Kamëz, Luftëtari befason në fund, duke arritur të marrë një 3-pikësh me mjaft vlera. Deçiziv ishte goli i shënuar nga Elvi Rroca në minutën e 93-të, që shtangu vendasit dhe i dha fitoren skuadrës së Likës. Gjirokastritët luajtën mjaft mirë në 45-minutëshin e parë, duke vënë në vështirësi skuadrën e Ndreut. Luftëtari pati disa mundësi të mira, ndërsa arriti të godasë edhe traversën me anë të Dejvi Bregut, por nuk arriti të dërgojë topin në rrjetën e portierit Halilaj.
Edhe në pjesën e dytë, sërish gjirokastritët patën iniciativën, duke sulmuar vazhdimisht nga krahët, me dyshen Bregu-Abazaj, por pa arritur të konkretizojnë. Nga ana tjetër, Kamza nuk arriti të vërë në vështirësi serioze skuadrën e Likës, ndërsa tentoi 2-3 herë nga distanca. Luftëtari arriti të shënojë vetëm në minutën e 3-të shtesë, me anë të sulmuesit Elvi Rroca, që dërgoi topin në rrjetën e Kamzës dhe i dha fitoren gjirokastritëve.
