Familjarët e Xhevit Shutit kanë treguar tmerrin e përjetuar nga policia gjatë arrestimit.
Daja i Shutit ka folur për arrestimin e këtij të fundit, i cili dyshohet se punonte në laboratorin ku përpunoheshin drogat e forta.
Të pyetur nga gazetarja e News 24, familjarët thanë se ishin terrorizuar nga policia, ndërsa tregojnë se kjo e fundit ka vënë në pranga edhe gruan e Shutit dhe djalin e tyre 15-vjeçar.
“Erdhën dhe arrestuan të gjithë familjen. Policia arrestoi Xhevitin së bashku me bashkëshorten Anilën duke lënë vetëm dy fëmijët e mitur. Policia mori edhe djalin 15 vjeçar. Që prej arrestimit nuk kemi pasur asnjë kontakt me ta, fëmijët janë terrorizuar. Nëna e Xhevitit është e paralizuar dhe ka nevojë për shërbim,” u shprehën familjarët.
Të arrestuarit janë Flamur Bisho Çela, Xhavit dhe Mustaf Shuti si dhe shtetasit me inicialet V.B. e A.SH.
Një nga të arrestuarit, Flamur Bisho Çela punon prej 26 vitesh si shofer tek zjarrfikëset në Shkodër.
Nga operacioni janë zbuluar më shumë se 100 kg drogë e dyshuar heroinë, e cila është sekuestruar nga policia.
