Kuvendi, në një seancë të jashtëzakonshme parlamentare, miratoi sot me 92 vota pro Gerti Bogdanin në komisionin ad hoc në vend të deputetes Jorida Tabaku, e cila para pak ditësh u bë nënë e dy binjakeve.
Plotësimi i përbërjes së këtij komisioni i hap rrugën dhe procedurave të votimit prej tij të kandidatëve që do të përzgjidhen për Komisionin e Pavarur të Kualifikimit dhe Komisionerin Publik.
Gjatë seancës së sotme u bë edhe betimi i Avokates së re të Popullit, Erinda Ballanca e zgjedhur nga parlamenti, pak javë më parë, me propozim të opozitës.
Deputetët mbajtën një minutë heshtje për ish kancelarin gjerman Helmut Kohl, pas kërkesës së ish-Kryeministrit Sali Berisha.
