Në Kuvendin e Republikës së Maqedonisë sot fillon debati për Propozimin për ndryshim dhe plotësim të Buxhetit të Republikës së Maqedonisë për vitin 2017. Në rend dite të Komisionit kuvendor për financim dhe buxhet është vendosur ribalancimi i Buxhetit i propozuar nga Qeveria. Me ribalancimin e Buxhetit parashikohet që deficiti të mbetet 2,9 për qind, ndërsa rritja të jetë 2,2 për qind në vend të parashikimit të qeverisë, prej 3 për qind dhe 2,8 për qind që projektoi Banka Botërore.
Për të kursyer mjetet financiare janë shkurtuar të gjithë shpenzimet joproduktive të qeverisë dhe institucioneve të saj. Është parashikuar që nga shkurtimi i shpenzimeve të kursehen tre miliardë denarë, por siç shpjegoi kryeministri Zoran Zaev do të vijojë realizimi i të gjitha projekteve infrastrukturore tashmë të filluara dhe do të shtohen disa të reja. Të ardhurat e përgjithshme janë projektuar në 184,7 miliardë denarë, shpenzimet në 203,3 miliardë denarë, ndërsa deficiti buxhetor në 18,6 miliardë denarë ose 2,9 për qind nga BPV-ja.
Parashikohet që me nëntë milionë euro të plotësohen të gjithë masat dhe politikat aktive për mbështetje të punësimeve të reja, para së gjithash për të rinjtë dhe për projektin “Garanci për të rinjtë”.
Me rreth 135 miliardë denarë do të sigurohet mbështetje për ndërmarrjet e vogla dhe të mesme, si dhe investimeve vendore, ndërsa 500 milionë denarë janë të parashikuar të shkojnë në mbështetje të tërheqjes së donacioneve nga IPA programi për intensifikim të aktiviteteve të mbështetura nga Bashkimi Evropian.
Ribalanci i buxhetit është në rend dite edhe në Komisionin kuvendor juridiko-ligjdhënës. Krahas komisioneve për financim dhe buxhet dhe Komisionit juridiko-ligjdhënës sot në Kuvend seancë do të mbajë edhe Komisioni për punë dhe politikë sociale.
