Të dhëna të dyshimta dhe kontradiktore kanë dalë për ngjarjen e ndodhur në ish-Bllok. Në dëshminë e tij Ervis Martinaj, është shprehur se ngjarja nuk ka lidhje me këngëtaren Elvana Gjata.
Martinaj ka thënë përpara hetuesve se ai nuk ka pasur konflikte me njeri. Biznesmeni i lojërave të fatit ka pranuar se në lokal ishte ftuar prej Matës. “Unë nuk kam gisht në konflikt. Unë jam gjendur aty rastësisht, pasi jam thirrur nga Ervin Mata për një takim. Me këtë të fundit kam marrëdhënie normale, nuk kemi pasur konflikte. Kam qenë i shoqëruar me Gaxhën dhe me Eljon Hatën, por jam plagosur rastësisht, pasi nuk kam qenë pjesë e konfliktit”, mësohet të ketë thënë Ervis Martinaj.
Ndërsa në dy dëshmitë e tjera të dhëna nga nipi i Martinajt, Geldo Hoti dhe pronari i lokalit Redi Popescu, shprehen se shkak ka qenë këngëtarja.
Redi Popescu ka thënë se: “I plagosuri dhe i vrari ishin njerëzit e Ervis Martinit dhe konflikti ka nisur për arsye banale. Konflikti ka nis në lidhje me ngacmimin e të dashurës së shtetasit Ervin Mata, shtetases Elvana Gjata. Ervin Mata me Ervis Martinin janë takuar qetësisht në lokal pa ndonjë tendencë për t’u agravuar situata. Kur ka ardhur në dyqan Ervis Martini ka zbritur nga një automjet tip BMW me ngjyrë të errët”.
Ndërsa mes rreshtash në dëshminë e Geldo Hotit lexohet: “Rreth 1 orë më pas, Ervini ka dal jashtë lokalit ku është takuar me shtetasen Elvana Gjata, e cila sipas tij është e fejuara e Ervinit. Kur është kthyer brenda u ka thënë se dikush i kishte ngacmuar të fejuarën dhe ky person do të vinte në lokal për t’u sqaruar”.
Ngjarja
Më 4 tetor nga përplasja me armë zjarri në ish-Bllok mbetën dy persona të plagosur dhe një i vrarë. Për këtë ngjarje të rëndë policia ka shpallur në kërkim tre persona të cilët janë:
Ervin Mataj, i dyti Merviol Bilo, komandoja që mendohet se ka qëlluar me armë dhe i treti Fabiol Alushi.
Në konfliktin e armatosur janë përfshirë 6 persona, pjesëtarë të dy grupeve.
Në njoftimin zyrtar thuhet se viktimë ka mbetur Fabian Gaxha, ndërsa të plagosur kanë mbetur Ervis Martinaj dhe Eljon Hato. Këta të tre kanë qenë bashkë të ulur në një tavolinë në momentin kur ndodhi ngjarja.
Fillimisht palët janë konfliktur verbalisht. Më pas mes tyre ka shpërthyer një konflikt fizik që në pak sekonda ka degjeneruar në përdorimin e armëve. Nuk është e qartë se kush nga të 6 personat e përfshirë në konflikt ka përdorur armët. Por grupi hetimor dyshon se ka qenë një nga tre personat e shpallur në kërkim, ai që ka qëlluar mbi grupin rival.
/Tirana Today/
