Komisioni Qendror i Zgjedhjeve ka verifikuar të dhënat në formularin e vetëdeklarimit të deputetëve, ku rezulton se 3 prej tyre kanë pasur precedentë penalë në të kaluarën.
Pavarësisht kësaj, KQZ ka arritur në konkluzionin se asnjë prej tyre nuk është në kushtet që t’i refuzohet kandidimi për deputet. Bëhet fjalë për kandidatët e partisë Lëvizja Socialiste për Integrim në Berat, Kukës dhe Tiranë.
Mësohet se këta kandidatë janë:
- Klajdi Qama, kandidat i LSI-së në Berat, i renditur i 7-ti në listë. Ai ka deklaruar se është dënuar nga Gjykata e Rrethit Gjyqësor Berat për “Kundravajtje Penale”.
- Sokol Ponari, kandidat i LSI-së në Kukës, i renditur i 2-ti në listë. Ai ka deklaruar që është dënuar nga Gjykata e Rrethit Gjyqësor, për Kundravajtje Penale “Punë në Interes Publik”.
- Ylli Shehu, kandidat i LSI-së në Tiranë, i renditur i 9-ti në listë. Sipas BalkanWeb, ai është dënuar me gjobë me vendim gjyqësor të formës së prerë të Gjykatës së Rrethit Gjyqësor Tiranë, për Veprën Penale “Kontrabandë me mallra të tjerë”.
KQZ bën me dije se sipas ligjit të dekriminalizimit, asnjë nga kandidatër nuk është në kushtet e nenit 2, të ligjit nr.138/2015, për refuzimin e tyre si kandidat për deputet të LSI-së.
