Vjosa Osmani (Sadriu) u zgjodh të dielën Presidentja e Kosovës, në raundin e tretë të votimeve. Ajo është e dyta grua që mban postin e Kreut të Shtetit, pas Atifete Jahjagës, si dhe e gjashta në radhën e të zgjedhurve në këtë post. Karriera politike e Osmanit ka filluar në vitin 2006 ku ka qënë Shefja e Shtabit dhe këshilltare e Presidentit të atëhershëm Fatmir Sejdiu. Osmani ka qënë deputete në katër mandarte në Kosovë, ndërkohë që në votimet e 14 Shkurtit u bë deputetja e Kosovës më e votuar në të gjithë historinë e zgjedhjeve parlamentare, si dhe politikania e dytë më e votuar në Kosovë.
Në vitin 2020 Osmani mori postin e Kryetares së Kuvendit, duke u bërë gruaja e parë në këtë post, ndërkohë që po atë vit ajo u bë edhe Presidentja e Kosovës në Detyrë pas dorëheqjes së Hashim Thaçit.
Karriera arsimore;
Vjosa Osmani Sadriu u lind më 17 maj 1982 në Mitrovicë. Shkollimin fillor dhe të mesëm ajo e kreu në vendilindjen e saj, në Mitrovicë e më pas Fakultetin e Drejtësisë e përfundoi në Universitetin e Prishtinës. Studimet Master dhe studimet e Doktoraturës i ka të mbaruara në Universitetin e Pittsburghut në Pensilvani, ShBA.
Që nga viti 2006 ka ligjëruar në Fakultetin Juridik të Universitetit të Prishtinës, ndërsa si profesor vizitor ka ligjëruar edhe në Universitetin e Pittsburghut në ShBA. Për disa vite ka ligjëruar edhe në RIT – Kosovo (AUK), Kolegjin AAB – Riinvest si dhe ka mbajtur ligjërata tematike në universitete të tjera në Evropë e në ShBA. Nga Universiteti i Pitsburgut është nderuar me çmimin “Sheth International Aëard”.
Është anëtare e Bordit të Rrjetit Parlamentar të Bankës Botërore dhe Fondit Monetar Ndërkombëtar dhe anëtare në Komisionin Drejtues të Deputetëve të rinj të Bankës Botërore dhe FMN-së.
Karriera politike;
Gjatë viteve 2006-2010, Vjosa Osmani ka shërbyer si Shefe e Stafit të presidentit Sejdiu dhe Këshilltare e Lartë për çështje Ligjore dhe Marrëdhënie Ndërkombëtare. Ajo ka përfaqësuar Presidentin në Komisionin për hartimin e Kushtetutës së Republikës së Kosovës. Ka qenë anëtare e ekipit përfaqësues të Republikës së Kosovës në rastin para Gjykatës Ndërkombëtare të Drejtësisë lidhur me shpalljen e pavarësisë së Kosovës.
Ajo është zgjedhur deputete në Kuvendin e Republikës së Kosovës në katër mandate. Në mandatet e kaluara ajo ka udhëhequr Komisionin Parlamentar për Punë të Jashtme, Komisionin për Integrime Evropiane dhe ka qenë Nënkryetare e Komisionit për Reformë Kushtetuese. Më 3 shkurt 2020, Vjosa Osmani u zgjodh kryetarja e parë grua e Kuvendit të Republikës së Kosovës. Më 5 nëntor 2020, ajo mori detyrën e u.d. si Presidente e Republikës së Kosovës.
Në vitin 2019, ajo ishte kandidate për kryeministre nga radhët e LDK-së, por humbi zgjedhjet e kryeministër u bë Albin Kurti, si fitues i tyre. Më pas, ish drejtuesi i LDK-së preferoi Abdulla Hoin në vend të promovimit të Osmanit, duke sjellë kështu një përçarje përfundimtare mes asaj dhe LDK-së. Në zgjedhjet e 14 shkurtit 2021 ajo ishte e para në Listën e përbashkët me VV-në e Albin Kurtit, duke shënuar edhe politikanen më të votuar në Kosovë.
Vjosa Osmani është e martuar dhe ka dy vajza binjake. Ajo flet gjuhën angleze, turke, serbo-kroate dhe komunikon në spanjisht.
