Një si unë, si ty, si të gjitha. Por një prej atyre pak që, përtej klisheve, është me të vërtetë vetvetja… Është një Lea që nuk dorëzohet nga jeta, as nga një provim i humbur, as nga një i dashur vagabond, siç e quan Alban Skënderaj me shqipen e tij të pastër. Por është Lea që të gjithë e duan…
Ndryshe nga të gjitha herët e tjera, kënga e fundit e Alban Skënderajt nis dhe përfundon me një protagoniste të vetme. Por aq sa specifike duket në pamje të parë fabula e këngës së tij, aq është e thellë dhe universale. Lea nuk është thjesht dhe vetëm një studente që demoralizohet nga një provim, apo ajo që zhgënjen prindërit që kishin të tjera pritshmëri. Nuk është as Lea që sakrifikohet për të bërë atë që do, por është ajo që “kërcen, si të mos kishte asnjë problem dhe qesh dhe kur duhet të qajë…” Pavarësisht të gjithave, është një Lea që do të jetojë sipas mënyrës së saj, shkruan Class. 
Po cila është Lea e vërtetë? Aktorja që luan këtë rol nuk e ka për herë të parë pjesëmarrjen në një videoklip. Ajo ka qenë edhe më herët aktore në klipin “Gjuj me dritë” nga grupi Oborri, nga Prishtina.
Por Rinesa është bërë pjesë edhe e modelingut. Dy vjet më parë, ajo ka qenë modele e koleksionit “Fall For It” të stilistes Diana Qerimi, së bashku me Irisa Thaqin.
Modelimin dhe aktrimin, duket që nuk e ka aspak sfidë, por më shumë se kaq, Rinesa ka edhe një profil Instagrami të cilin duhet ta vizitoni patjetër. Moderne, pa kokëçarje, ekspresive, pak gansta – por shumë, shumë e veçantë. Një profil që flet me çdo gjymtyrë… Të mos flasim pastaj për stilin… Rinesa paska qenë Lea e vërtetë.
Një si unë, si ty, si të gjitha… Një si ajo që ke gjithmonë brenda vetes, por jo gjithmonë do ta thuash
