Ditën e sotme, një doganier ka rënë në pranga pasi lejoi kalimin e 4 mjeteve me mall të dyshuar kontrabandë, pa ushtruar kontrollin përkatës. I arrestuari për “shpërdorim detyre” është shtetasi Lulzim Kodra, 59 vjeç, banues në Sovjan Maliq.
Por, pas arrestimit është zbuluar një tjetër detaje lidhur me doganierin që ka rënë në pranga. Ky i fundit është djali i tezes së deputetit të PS-së në Pogradec, Ilir Xhakolli.
Gjithashtu janë arrestuar edhe 3 shtetas të tjerë si dhe 1 shpallet në kërkim, për veprën penale “Kontrabanda me mallra të tjera”, shtetasit me inicialet: R.Sh, 29 vjeç, K. M 23 vjeç, P. V, 45 vjeç.
Si edhe u shpall në kërkim shtetasi G.M, 29 vjeç, banues në Bilisht Devoll.
Shtetasit e mësipërm, janë kapur në Bilisht, me mjetet e tyre respektive në të cilat iu gjetën të ngarkuara mallra të dyshuara kontrabandë (fruta të thata) të cilat kanë kaluar nga Pika e Kalimit Kufitar të Kapshticës ku shtetasi L.K, dyshohet të ketë shpërdoruar detyrën duke mos zbatuar procedurat e kontrollit të këtyre mjeteve.
Materialet për hetime të mëtejshme i kaluan Prokurorisë të Rrethit Gjyqësor Korçë për veprat penale bazuar në nenet 248 e 174 të Kodit Penal.
