Kryeministri Edi Rama ka pasur një debat me një nga studentët, i cili foli ashpër ndaj tij gjatë takimit në Vlorë.
“Ti je mashtrues, po e trajton këtë popull si dele dhe shpresoj të mos më pushkatosh se e ke kthyer këtë vend në komunizëm».
E sigurisht këto fjalë kanë acaruar Ramën, i cili i tha studentit se ai do shpallet hero nga Saliu, ndërsa i kërkoi të mos e quajë popullin dele, pasi kush e bën një gjë të tillë, është thjesht një lepur.
“Zotësia është tek argumenti. Jam i sigurt që do shpallesh hero te Saliu.
Bashës i dhashë mundësi që të bëhej lider. Iu luta, lëre çadrën, hajde flasim. Ai thoshte plotëso pikat. E ca do bënte, u bë gjë? Po ti s’i di as 8 pikat.
Pse nga ty kujton se shqetësohem unë? Mos thuaj populli është dele dhe të mendosh se je më i zgjuar, ti nuk je ujk, je lepur. Kush mendon se populli është dele,se e shof shpesh. Diktaturë, e meritojnë. Ca diktature këtu mo? E di ca është diktatura? Kjo është përtej demokracisë që ty të jepet e drejta të flasësh si e ëma e Zeqos në majë të thanës.
Ndrysho dhe filloje nga kjo. Ky popull është kaq i zgjuar dhe askush nuk flet dot në emër të popullit. Ju që i thoni popullit dele, jeni lepuj që bëni luanin.
Më dukesh si ai miu që kishte pirë, ishte tapë dhe thoshte ku është ai maçoku ta shqyej se s’po më del përpara. Nuk po ta them si mbaron, se unë s’jam maçoku, ti s’je miu. Pikat do plotësohen, me ty, pa ty sepse besoj se janë të drejta dhe dialogu duhet për të gjitha këto që u thanë këtu.
Në janar s’do paguani më atë që do paguanit në janar. Do paguani gjysëm e tarifës”, përfundoi Rama./ TIRANA TODAY
