Anësori Ivan Perisic ka rrëfyer se ka qenë shumë pranë largimit nga skuadra e Interit, pas një oferte nga Manchester United.
Kjo ofertë i është bërë lojtarit vitin e kaluar, megjithatë ai u bind që të qëndronte te Interi nga trajneri Luciano Spalleti, duke bërë që të nënshkruajë një kontratë të re 5-vjeçare.
“Është e vërtetë se një ofertë nga Manchester United ishte në tryezën time. Kam qenë shumë afër largimit nga Interi. Kur erdhi Luciano Spalletti tregoi dëshirë të jashtëzakonshme për të më mbajtur në ekip. Dhe e bëri të qartë se nuk dëshironte të më humbiste. Kjo ishte shumë inkurajuese për mua, ndikoi në vendimin tim për të qëndruar tek Interi. Në futboll, detajet e vogla në këto situata janë me rëndësi.
Admirimi nga një trajner si Mourinho ishte pa dyshim diçka që më tundonte. Ishte konfirmim i punës së madhe dhe shfaqjeve të mira të miat. Kur lavdërohesh nga një njeri si Mourinho, trajner i një klubi të madh si Manchester United, është e vështirë të mos mendosh për një ofertë të tillë. Jam i lumtur që ai ka një mendim të tillë për mua. Këto gjëra më motivojnë të punoj dhe të stërvitem shumë, për të arritur performancat më të mira”.
Më tej, 29-vjeçari rrëfeu se mund të bëjë një ndryshim në karrierë, duke zgjedhur Premier League, ose La Liga-n ndërsa shtoi se në futbollit nuk duhet të thuash kurrë ‘kurrë’.
“Në futboll, kurrë mos thuaj kurrë. Që nga fillimi i karrierës sime, kam pasur ambicien të luaj në të gjitha ligat e mëdha të mundshme. Pra, ende e kam këtë dëshirë për ta testuar veten në ligat e tjera. Sidomos në dy prej tyre, në ligën spanjolle dhe atë angleze.
Shpresoj që tifozët e Interit ta kuptojnë pikëpamjen time. Unë jam një sportist profesionist, më pëlqejnë sfidat dhe kjo është forca ime lëvizëse. Çfarë do të sjellë e ardhmja, nuk e di. Tani për tani jam i përqendruar tek Interi, ndërsa përpiqemi të bëjmë një hap më të madh përpara nga sezoni i kaluar”, përfundoi ai.
