Përplasjet politike se kush duhet të jetë e kryeprokurori i vendit, qoftë dhe i përkohshëm, ka bërë një zhurmë të madhe në media. Kandidati Ferdinand Elezi është përfolur shumë në media dhe është gjykuar si kryeprokurori i ardhshëm.
Thuajse të gjitha mediat nxituan të nxirrnin foton e kandidatit për kryeprokuror. Në fotot e publikuar shihej Ferdinand Elezi, një burrë i fisshëm me kravatë. Por Ferdinand Elezi që doli në media nuk është kandidati për kryeprokuror.
Ferdinand Elezi që doli në media është emigrant në Greqi prej 20-vitesh. I kontaktuar nga redaksia e Tirana Today, Ferdinand Elezi deklaroi se nuk ka kandiduar për kryeprokuror. Ai shpjegon se nuk është hera e parë që media përdor fotografinë e tij për ta identifikuar si Prokuror. E njëjta gjë ka ndodhur dhe tre vite më parë kur prokurori u bë kreu i Apelit në Durrës.
“Jam habitur kam parë foton time në edicionin e lajmeve në Top Channel. Unë jam Ferdiand Elezi dhe ajo që doli në media është fotoja ime, por unë nuk kam kandiduar për kryeprokuror. Nuk kam lidhje me sistemin e drejtësisë. Nuk është hera e parë që përdorin foton time për të identifikuar prokurorin. Ka ndodhur dhe në 2013-ën kur prokurori Fedinand Elezi u zgjodh kreu i Apelit në Durrës. Dhe atëherë pash foton time në media. Kanë filluar të më shkruajnë dhe të me përshëndesin në Facebook njerëz që nuk i njoh. Nuk e di pse gazetarët kanë marrë foton time, por uroj që kjo ngatërresë të zgjidhet shpejt. Unë nuk kam asnjë lidhje me kandidatin për kryeprokuror përveç emrit dhe mbiemrit të njëjtë. I uroj adashit tim, kandidatit për kryeprokuror, Ferdinand Elezit suksese,” deklaron Ferdinand Elezi nga Loutraki, në Greqi.
Në Top Channel u publikua lajmi se Ferdinand Elezi është kandidat për kryeprokuror, por fotoja ishte e shqiptarit emigrant në Greqi. Vetëm dy ditë më parë korrigjohet gabimi dhe ne media publikohet fotoja e kandidatit për kryeprokuror.
Pse u ngatërruan gazetarët?
Presioni i madh në media i bën gazetarët që ta kenë të pamundur të investigojnë për lajmet që i kërkojnë. Presioni dhe faktori kohë i bën ata që të përdorin rrjetin social “Facebook” për të marrë fotot e personazheve të tyre madje dhe pa i verifikuar. Aty është marrë dhe fotoja e Ferdinand Elezit por që në fakt nuk është kandidat për kryeprokuror.
Lajmi me foton e gabuar është publikuar; Televizioni Top Channel, Opinion.al, NewsBomb.al, Syri. net, Tirana Post por dhe një blog në gjuhë të huaj si news.albania.de. Tirana Today
Televizioni Top Channel
Opinion.al
NewsBomb.al
Syri. net
Tirana Post
