Kreu i Partisë Demokratike ka komentuar ftesën e kryeministrit Rama për të folur, pas vendimit të opozitës për djegien e mandateve.
Por, duket se Basha nuk ka ndërmend të ulet me kryeministrin, teksa tha se takimi i vetëm i tij do të jetë me shqiptarët më 16 mars.
Basha tha ndër të tjera se opozita po sakrifikon me djegien e mandateve, në mënyrë që në të ardhmen, Shqipëria të futet në BE dhe shqiptarët të kenë një standard jetese si në cdo vend tjetër evropian.
Fjala e Bashës:
Takimi i vetëm që unë kam është me qindra mijëra shqiptarë më 16 mars.
Me kë të dialogosh? Kam këtu të gjithë ata njerëz që e kuptojnë se nuk bëhet fjalë për fatin e një partie demokratike, por për fatin e shqiptarëve. Mund të vazhdohet kështu, duke i vjedhur dhe duke i gënjyer shqiptarët?
Vendi është në emergjencë kombëtare, ka nevojë për një zgjidhje që t’i shërbejë interesave të shqiptarëve jo për një tango që të mbajë në pushtet një grup pushtetarësh të lidhur me krimin e organizuar.
Nëse qeveria kapet duke vjedhur, ajo ikën dhe futet në burg në çdo vend evropian. Detyra jonë është që këto standarde, t’ia garantojmë shqiptarëve. Nuk kërkojmë asgjë më shumë se sa kushtet që Evropa ka garantuar për qytetarët e saj dhe nuk do të pranojmë asgjë më pak. Është radha e opozitës të bëjë sakrificën e saj, e bëjmë që të hapim derën e futjes së Shqipërisë në Evropë. S’i trembemi asgjëje, ora e asamblesë së krimit i ka ardhur fundi. Këta kanë marrë fund! Takimi është me popullin më 16 mars./ Tirana Today
