Në përgjigjie të akuzave që Presidenti i Kosovës Hashim Thaçi, lëshoi ndaj Brukselit dhe veçanërisht ndaj Komisionerit për Zgjerim, Hahn, për neglizhencë e mosprezencë në Ballkanin Perëndimor, shefja e BE-së në Kosovë, Natalia Apostolova deklaroi se ky qëndrim është një përpjekje e Kosovës për t’iu shmangur përgjegjësive.
Në një intervistë për “Koha Ditore”, ajo tha se fushata parazgjedhore në Kosovë po shfrytëzohet nga politikanët për të shmangur vëmendjen duke kërkuar “kurban” diku tjetër.
“Politikanët në mënyrë të përsëritur kanë dështuar të ratifikojnë marrëveshjen e demarkacionit me Malin e zi, prandaj përgjegjësia është e tyre”, theksoi zyrtarja e BE-së.
Thaçi kishte kritikuar ashpër BE-në për mungesë vizioni e guximi, në vizitën e fundit në Austri. Ai i tha agjencisë austriake të lajmeve “APA” se edhe kriteri i demarkacionit është vendosur padrejtësisht në momentet e fundit, duke ia pamundësuar Kosovës liberalizimin e vizave.
Kujtojmë se një natë më parë në Bruksel, Përfaqësuesja e Lartë për Politikë të Jashtme dhe Siguri e BE-së, Federika Mogerini, darkoi me kryeministrat e gjashtë vendeve të rajonit, Shqipërisë, Kosovës, Serbisë, Malit të Zi, Bosnjë e Hercegovinës dhe Maqedonisë, (ky i fundit në cilësinë e “i përcaktuar për kryeministër”).
