Presidenti i Shqipërisë, Ilir Meta pas takimit me homologun e Maqedonisë, Gjorge Ivanovin u vendos në siklet nga pyetjet e gazetarëve në konferencën e përbashkët për median. Meta refuzoi të jepte përgjigje të drejtpërdrejta, por tha gjëra përgjithësuese.
I pyetur se si e komenton qasjen e gjyqësorit ndaj shqiptarëve në Maqedoni, por edhe qëndrimin e qeverisë aktuale si e përmbajtur ndaj anëtarësimit të Kosovës në institucionet ndërkombëtare. Meta tha se qeveria duhet të veprojë sipas standardeve evropiane. Në ketë rast pyetja ishte e drejtpërdrejtë për rastin e grupit Kumanova nga të cilët 7 u dënuan me burgim të përjetshëm dhe 746 vite për të tjerët.
Meta: Unë besoj se qeveria e re e cila është përkushtuar për t’i dhënë një hov çështjes së integrimit evropian për anëtarësim në NATO, padyshim që është dhe do të jetë e angazhuar për të përmirësuar edhe më tej marrëdhëniet me të gjitha vendet fqinje edhe me Kosovën. Dhe besoj që edhe autoritetet e Maqedonisë dhe në mënyrë të veçantë ato gjyqësore do të jenë të interesuar për të demonstruar standarde evropiane.
Gjithashtu, Meta është provokuar nga një gazetar maqedonas i pranishëm në konferencën e përbashkët me pyetjen për njohjen e minoritetit bullgar në Shqipëri.
Gazetari maqedonas pyeti Metën, “Ju thatë se krenoheni me minoritetin maqedonas në Shqipëri, por a mund të na thoni sa bullgarë ka në Shqipëri dhe cili ishte shantazhi që Bullgaria i bëri Shqipërisë për të përfshirë minoritetin bullgar në ligjin për minoritetet?”
Presidenti Meta iu përgjigj duke deklaruar se legjislacioni ishte në përputhje me standardet evropiane dhe u shpreh se në Shqipëri nuk inkurajohen zhvillime që nuk i korrespondojnë realitetit të përfaqësimit etnik, duke iu referuar në këtë mënyrë frikës së maqedonasve se njohja e minoritetit bullgar do të ndikojë negativisht në përfaqësimin e tyre.
Meta: Dëshiroj të nënvizoj që Shqipëria është e angazhuar që të respektojë të drejtat e pakicave etnike dhe kulturore, në këtë drejtim ka patur një rivlerësim të legjislacionit në përputhje me standardet evropiane. Qeveria dhe Parlamenti i Shqipërisë kanë treguar fleksibilitet dhe tolerancë maksimale, por kjo nuk do të thotë që ne inkurajojmë zhvillime që nuk do t’i korrespondonin atij realiteti që është në Shqipëri sa i përket përfaqësimit etnik apo kulturor. Unë dua të nënvizoj edhe njëherë vlerat e shkëlqyera dhe shumë mirë të integruara të minoritetit maqedonas në Shqipëri dhe kam siguruar presidentin Ivanov që gjatë mandatit tim do të jem pranë këtij komuniteti dhe të ruaj identitetin e tyre pasi është një pasuri për Shqipërinë.
