Një kompani private në Dubai ka shprehur interes për ndërtimin e një kulle në zgjatimin e bulevardit të ri të Tiranës.
Investimi i kompanisë për kullën kap shifrën e 250 milion dollarëve, ndërsa qeveria ka dhënë “PO-në” e saj, për miratimin e kësaj kontrate investimi.
Projekti quhet “Kulla Ikonike e Tiranës”, ndërsa investitori quhet “Al Habtoor Investment LLC”.
Në kërkesën e interesit nga ana e kësaj kompanie, sipas relacionit të qeverisë, është kërkuar transferimi pa kosto dhe në pronësi i një sipërfaqeje prej 25.000 m2, të një parcele trekëndore në zgjatim të bulevardit të ri në Tiranë.
Si këmbim, Bashkia e Tiranës do të marrë një sipërfaqe ambientesh. Gjithashtu, kërkohet përjashtimi nga taksat doganore, TVSH-ja, tatimi mbi fitimin apo çfarëdolloj takse tjetër mbi kapitalin për 15 vjet nga fillimi i veprimeve tregtare.
