Banorët e Kukësit vijojnë të protestojnë para Komisariatit të Policisë, ndërsa bëjnë thirrje për lirimin e bashkëqytetarëve të tyre. Kujtojmë se deri tani janë arrestuar 23 persona, por ndërkohë janë lëshuar edhe 23 urdhër arreste të tjera.
Protestuesit janë shprehur të revoltuar dhe kanë kërkuar lirimin e menjëhershëm të personave të arrestuar. Mes brohorimave banorët deklaruan se prona e djegur gjatë protestës së djeshme është një pronë hajdutësh dhe jo pronë publike.
“Ne jemi kundër dhunimit të pronës private, por ajo që në prishëm dje ishte dhunim i pronës së hajdutëve”- tha një protestues.
Ndërkohë kuksianet i kanë kujtuar të shkuarën kryeministrit Rama duke i kujtuar përplasjet historike me serbët. Njëzëri banorët i kërkuan kryeministrit dhe policisë të distancohen nga aktet e dhunshme, ose ndryshe do t’i bashkohen Kosovës.
“Ne jemi qytetarët e Lumës. Ne kemi hedhur në lumë 12 mijë serbë. Ne jemi të vendosur dhe bëjmë thirrje Edi Ramës dhe Policisë të bëjnë kujdes. Ne do të vijojmë të qëndrojmë dhe rezistojmë deri në vdekje. Nëse nuk reagojnë, ne do të vendosim kufirin tek tunel i dhe do t’i bashkohemi Kosovës”-tha një protestues.
