Laçi-Kukësi, një duel mjaft i zjarrtë që ka krijuar gjithmonë një atmosferë elektrizuese. Ndeshja fitohet nga miqtë me rezultatin e ngushtë 1-0 dhe vazhdon ndjekjen e Skënderbeut të vendit të parë. Ndeshja është zhbllokuar që në minutat e para me anë të kapitenit të “Armatës së Veriut”, Shametit dhe pritej që të kishte shumë gola. Por ndodhi e kundërta pasi në fushë pamë spektakël, raste pa fund dhe penallti të humbur. Një ndeshje mjaft delikate për gjyqtarin Kridens Meta, i cili është kontestuar shumë gjatë këtij takimi.
Shameti kalon Kukësin në avantazh teksa godet saktë me kokë një top të krosuar në zonë nga një goditje këndi nga e majta. Në ritme të larta dhe me shumë raste ka vazhduar pjesa e parë deri në fundin e saj, por që nuk kanë arritur asnjëra nga skuadrat ta dërgojë topin në rrjetë.
Rastin më të artë e kishte Laçi, pasi fiton një 11-metërsh në minutën e 48’ të shtesës në pjesën e parë, por nuk arrin ta shfrytëzojë si duhet. Eskerda merr përsipër ekzekutimin e penalltisë por goditja e tij përfundon jashtë. Një mundësi mjaft e mirë shpërdorohet nga braziliani i cili kishte të gjitha mundësitë ta dërgonte skuadrën e tij me një barazim në dhomat e zhveshjes.
Pjesa e dytë vazhdon me ritme akoma më të larta, duelet e forta nuk mungojnë dhe arbitri Meta detyrohet të ndërpresë disa herë ndeshjen. Kur futet të 15’ minutat e fundit Laçi nuk ka çfarë humb dhe hidhet i tëri në sulm, Reginaldo shfaqet më i rrezikshmi me shumë shpërthime në zonë, por mbrojtja e Kukësit ishte gjithmonë e vendosur mirë duke bllokuar çdo rrezik drejt Koliqit. Në të 85’-ën është Xhixha në zonë ku tenton të shmangë Rrumbullakun,por ky i fundit ka vënë duart mbi të dhe e ka shtyrë, laçianët kërkojnë penallti por arbitri nuk është i këtij mendimi. Me Laçin në sulm mbyllet sfida, por duke mos arritur të dalë me pikë nga ky takim mjaft i mirë nga ana e tyre.
Gjatë ndeshjes tifozët vendas janë dëgjuar të lëshojnë një lumë sharjesh drejt futbollistëve kuksianë. Por nuk ka ndalur vetëm me kaq pasi në fillim të pjesës së dytë janë hedhur sende të forta në fushë në drejtim të skuadrës mike. Pankinat nuk kanë qenë aspak të qeta dhe kanë kontestuar shumë vendime të arbitrit, por në fund të pjesë së parë ka pasur edhe tension mes dy pankinave për atë 11-metërsh që u shpërdorua nga Eskerda. Me këtë fitore Kukësi i Milikovic rikthehet në vendin e dytë dhe shkurton në 5 pikë momentalisht diferencën nga Skënderbeu. Ndërsa Laçi mbetet në vendin e 5 me 15 pikë, por që rrezikon të parakalohet nga Partizani dhe Teuta.
LAÇI – KUKËSI 0-1
Shameti 4′
Laçi: Selmani, Fangaj, Qaqi, Gjoni, Shala (Kallaku 48′), Nika (Xhixha 58′), Jonuzi, Bardhi (Lushkja 66′), Uzuni, Eskerda, Rexhinaldo
Trajner: Gentian Mezani
Kukësi: Koliçi, Idrizi, Shameti, Hoxha, Rrumbullaku, Musolli, Imami, Guri, Bakaj, Kale (Kërkotiç 69′), Alijev (Peposhi 73′)
Trajner: Mlladen Milinkoviç
Gjyqtar: Kridens Meta
