Kukësi është ekipi që përfitoi më shumë nga vendimi i CAS, që e la Skënderbeun jashtë kupave të Europës. Pasi verilindorët do të nisin aventurën e tyre në Champions League, por objektivi do të mbetet faza e grupeve të Europa League. Tek Kukësi duket se ishin të përgatitur për këtë moment dhe ekipi është gati, u mungon vetëm një sulmues i fortë i cili do të zëvendësojë Sidrit Gurin.
Pak përpara nisjes për në Slloveni, drejtori sportiv i Kukësit, Nderim Nexhipi është shprehur se tashmë Kukësi e ka më të thjeshtë kalimin në fazën e grupeve për “Europa League”, pasi i duhen më pak fitore nga çfarë do të nevojiteshin më parë.
“Kemi bërë zgjidhjet e duhura, jemi blinduar mbrapa. Është rritur konkurrenca në ekip dhe tashmë na duhet një sulmues që e zëvendëson Guri. Jemi në negociata me sulmuesit dhe do ta mbyllim sa më shpejtë këtë çështje. Tani do shoh në aspektin ofensiv, për lojtarët që janë në gjendje të bëjnë diferencën.
Kemi 20 lojtarë shumë cilësorë në ekip. Edhe në sezonin e shkuar ishim shumë pranë grupeve të “Europa League”. Tani që e nisim në Champions, e kemi shumë më të lehtë rrugën për grupet e “Europa League”. Kemi të bëjmë me kampionatet e shteteve të ndryshme dhe duhet të respektojmë rivalët. Ekipin e Shkëndijës e njoh shumë mirë dhe unë nuk e kam qejf në short. Gjithsesi ne duhet të përqendrohemi te puna jonë”, ka thënë Nexhipi.
