Skema e Armando Cungut për të ndalur Qarabagun favorit në përballjen për në Champions League ka funksionuar më së miri. Kukësi ka marrë një barazim me shumë vlera 0-0 në “Loro Boriçi” përballë një kundërshtari mjaft të vështirë. Gjithçka mbetet e hapur për ndeshjen e kthimit, ku skuadrat do të ndajnë rrugët nëse do të luftojnë për Champions apo për Europa League.
Verilindorët ishin të përgatitur në prapavijë, pasi e dinin që do të vuanin në këtë sfidë dhe Cungu rreshtoi 5 mbrojtës të cilët rezultuan deçiziv në këto 90’ minuta. Pas Skënderbeut, Kukësi bëhet ekipi i dytë që ka ecur kaq larg në turet e Ligës së Kampionëve dhe tashmë ka shansin e artë për të kaluar më tej.
Edhe sot në “Loro Boriçi”, Kukësi ka bërë gjithçka shumë mirë, duke ndalur në mënyrë fantastike kërcënimet e miqve, por gjithashtu edhe në ndërtimin e aksioneve sulmuese, ndonëse pa saktësi në finalizim.
