Zbardhet dinamika e ngjarjes së rëndë të ndodhur disa ditë më parë në Velipojë, ku nga përplasja me armë midis familjeve Ferracaku dhe Gocaj, mbetën të vrarë 4 persona dhe 2 të plagosur.
Sipas të dhënave nga dosja e masakrës, vëllezërit Hasan dhe Kujtim Ferracaku, janë konfliktuar me vëllezërit Gocaj pak orë para krimit, lidhur me ndarjen e shezllonëve në plazh dhe në darkë janë takuar për t’u sqaruar me ta, shkruan Abc News.
Mësohet se Hasan Ferracaku në deklarimet e tij shpjegon se kishte disa ditë që ka pasur një konflikt për punë çadrash për në plazh me djemtë e Pjetër Gocajt nga Velipoja, ku ai ka marrë me qira ose leje për shfrytëzim të shezllonëve në plazh dhe tek vendi në fjalë kanë ndërhyrë edhe djemtë e Pjetrit dhe për këtë gjë janë konfliktuar.
Rreth mesnatës së 26 qershorit, Hasan Ferracaku me persona të tjerë nga fisi i tij kanë shkuar tek lokali i djemve të Pjetrit për tu sqaruar, dhe është ulur në tavolinë me njërin prej djemve Gocaj dhe pasi kanë biseduar, ka krisur arma.
Sipas Hasan Ferracakut një nga vëllezërit Gocaj ka qëlluar me automatik drejt Kujtimit. Ky i fundit i është kundërpërgjigjur me pistoletë dhe i është hedhur dhe ka kapur armen automatik të djalit të Pjetrit.
Nga këqyrja e vendit të ngjarjes, janë konstatuar një armë tip pistolete e llojit T-T, me 6 fishekë në krehër dhe një fishek në folenë e armës e gjetur dhe sekuestruar pranë viktimës Kujtim Ferracaku, 8 gëzhoja metalike mod.54 mm, 5 gëzhoja metalike mod.56 mm, 5 gëzhoja metalike mod.7.65 mm, 1 fishek i pa plasur mod.7.65 mm, 3 copë predha arme zjarri.
