Sot nis java e Sigurisë Rrugore, e cila do të vijojë me kontrolle intensive, që do t’u shërbejë edhe javëve në vijim teksa pritet kthim në atdhe të emigrantëve në kuadër të festave.
Drejtori i Policisë Rrugore, Mitat Tola, ka dhënë detaje lidhur me operacionin, teksa theksoi se policia tashmë ka rreth 20 radarë të lëvizshëm, të cilët do të mundësojnë kontrolle të vazhdueshme në territore të ndryshme.
Për sa i takon ndryshimeve në Kodin Rrugor, drejtori i Policisë Rrugore tha se synohet ashpërsim i masave për drejtuesit e mjeteve që përdorin celularin në timon:
“Përdorimi i celularit është një nga problemet kryesore, drejtuesit e mjetit e kanë në modë. Përdorimin e celularit nuk mund ta parandalojmë me masën ndëshkimore që kemi ne sot, s’e luftojmë dot me një gjobë apo ndëshkim 10- 15 lekë të vjetra.
Eksperienca me rripin, ku trefishimi i masës ka sjellë një përdorim të dukshëm në përdorimin e tij, shpresoj që edhe ashpërsimi i masave për celularin do bëjë që të ulet përdorimi i tij dhe të ulen pasojat e aksidenteve rrugore”, tha Tola.
