Kryeministri Edi Rama iu hakërrua sot strukturës së Ministrisë së Brendshme SHÇBA apo Shërbimit për Çështjet e Brendshme dhe Ankesat. Ai akuzoi se SHÇBA nuk kishte bërë publike videot e kamerave të policisë së Fushë-Krujës, ku vërtetohej se çështja “Xhisiela” ishte fund e krye një mashtrim.
Sipas Kryeministrit, shpifja goditi policinë dhe mori dhenë, ndërkohë që publikut shqiptar iu mohua e drejta për të parë të vërtetën.
Sigurisht që Kryeministri me këto akuza është krejtësisht i gabuar, nëse nuk ka dashur vetëm të ritransmetojë në publik, me lezet, një tjetër fakt – atë që thotë se kamerat e policisë së Fushë-Krujës vërtetojnë se Taulant Balla, deputeti Rraja, apo të afërm të tij, nuk kanë qenë në komisariat ditën e përfolur.
Por nga ana tjetër ai është krejtësisht jashtë logjike kur thotë se SHÇBA duhet të publikonte pamjet. Kjo sepse SHÇBA është një strukturë e Ministrisë së Brendshme që punon pikërisht për të kundërtën – ajo punon dhe investigon sa herë që policia, krerë të saj, apo punonjës të thjeshtë nxjerrin në media, apo rrjetet sociale, pamje filmike, foto, dokumente, apo të dhëna të tjera që përbëjnë sekret hetimor.
Sigurisht që Kryeministri Rama duhet ta dijë se është prokurori ai që merr në dorëzim të gjitha materialet e hetimit, qoftë ato të siguruara nga SHÇBA, dhe është sërish po ai, që vendos të publikojë njërën apo tjetrën.
Por edhe publikimi i materialeve me vendim të prokurorit ka radhën e vet. Zakonisht prokurori i çështjes, që është Zoti i gjithë punës që kryhet, apo ndërtohet, ka të drejtë që të publikojë një video, një foto apo një dokument, vetëm kur hetimi ka dështuar në identifikimin e autorit apo autorëve të një ngjarjeje me impakt të madh publik.
Pra me bërjen publike të këtyre materialeve, prokurori vlerëson si mundësi që publiku i gjerë të mund të japë të dhëna më dobiprurëse në favor të zbardhjes së çështjes me të cilën kanë lidhje.
Përmbledhur më shkurt, SHÇBA nuk ka asnjë mundësi ligjore të bëjë publike materiale hetimore dhe, nga ana tjetër, çdo publikim pa autorizimin e prokurorit përgjegjës të çështjes, përbën shkelje e cila të çon në përgjegjësi penale.
Për këto arsye Kryeministri Edi Rama gabonte kur u hakërrehej drejtuesve të këtij shërbimi – një gabim qoftë elementar, qoftë me kast, që duket provokonte edhe djersët e pazakonta që e mbuluan gjatë fjalës para drejtuesve të policisë./ Fe. De. TIRANA TODAY
