Prokurorja e Përgjithshme e Përkohshme Arta Marku bëri sot një deklaratë aspak profesionale kur tha se nuk e di se sa është numri i shqiptarëve të shpallur në kërkim për vrasje.
Deklarata e kryeprokurores u bë para komisionit të ligjeve ku ajo ishte ftuar për të prezantuar raportin vjetor të 2017-s për institucionin që drejton, gjithashtu që të jepte llogari për hetimet nda çështjes së Agron Xhafajt, çështjen Tahiri etj.
E pyetur nga deputeti i LSI-së, Nasip Naço nëse ajo e dinte numrin e shqiptarëve që ishin të shpallur në kërkim për vrasje brenda republikës së Shqipërisë, kryeprokurorja u përgjigj se nuk e dinte numrin por ftoi deputetin që të merrte informacion në polici.
Nuk e kemi një shifër të saktë të personave që janë të kërkuar për vrasje. Për këtë gjë mund të kërkoni informacion në polici,” deklaroi Arta Marku
Ndërkohë, deputeti Naço informoi kryeprokuroren Marku se numri është mbi 1500 persona dhe se është absurde që ajo nuk e ka këtë informacion sepse është ajo që udhëheq organin e akuzës.
