Kryeministri i ri Zoran Zaev dhe kabineti i tij u futën në godinën e qeverisë. Ish-kryeministri teknik Emil Dimitriev në mesditë i dorëzoi detyrën kryeministrit të ri Zoran Zaev. Ky i fundit tha se duhet vlerësim i ri i gjendjes në shtet por situata tani nuk është dramatike.
“U njoftova me të gjitha detajet e nevojshme dhe punët të cilat duhet t’i di që sot si kryeministër. U njoftova për gjendjen në shtet. Kuptohet që ajo nuk është e kristaltë por nuk është edhe dramatike. Të paktën ashtu na u tha. Neve kur do të bëjmë hetimin tonë për gjendjen aktuale do t’i njoftojmë qytetarët. Bashkë me kabinetin tim qeveritar dhe presidentin Ivanov konstatuam nevojën e bashkëpunimit. Vlerësoj se bashkëpunimi me Presidentin na duhet dhe këtë e ka të njohur edhe kabineti i tij. Jemi këtu për të kryer detyrat tona në interes të qytetarëve dhe të shtetit”, deklaroi kryeministri Zoran Zaev.
Kryeministri Zoran Zaev tha se pret dorëheqjen e kryeprokurorit Marko Zvërlevski, akt ky i cili do të jetë fillimi i reformave në drejtësi. Duke folur për financat, Zaev tha se gjendja e arkës shtetërore nuk i plotëson pritshmërinë e tij pozitive.
