Kryeministri i Spanjës, Mariano Rajoy ka rritur presionin ndaj Katalonjës, duke hedhur poshtë në mënyrë kategorike mundësinë e një ndërmjetësimi midis Madridit dhe Barcelonës, i propozuar nga presidenti rajonal i Katalonjës, Carlos Puigdemont.
Ky i fundit nënshkroi të martën në mbrëmje një deklaratë pavarësie, por e shpalli atë menjëherë të pezulluar për të mundësuar një dialog me Madridin.
Megjithatë, qeveria e Madridit kërkoi një sqarim, teksa kabineti i Rajoyt i dërgoi një pyetje zyrtare qeverisë së Puigdemont-it, duke vënë në lëvizje formalisht një procedurë për heqjen e të drejtave të autonomisë Katalonjës, në bazë të nenit 155 të kushtetutës spanjolle.
Pyetja për vlefshmërinë dhe përmasat e deklaratës së pavarësisë së Puigdemont-it ka rëndësi të madhe, sepse në kushtetutën spanjolle nuk është parashikuar shkëputja e një rajoni. Një shpallje e pavarësisë, sipas mendimit të qeverisë qendrore do të ishte një shkelje e qartë e të drejtave dhe do të kishte pasoja juridike, shkruan DË. Deklarata “simbolike” e Puigdemont-it ndodhet në një fushë juridike të pasqaruar.
