Kryetarja e Lëvizjes Socialiste për Integrim, Monika Kryemadhi ka reaguar sot lidhur me deklaratat e ashpra të kryeministrit ndaj gazetarëve.
Kryemadhi shkruan se Rama po e përdor median për të tërhequr vëmendjen nga seanca e djeshme.
“Sharjet dhe fyerjet e tij për gazetarët edhe në qofshin përpjekje për të tërhequr vëmendjen nga seanca e turpit që u zhvillua dje prapë janë shenjë e qartë e frikës së tij dhe banditëve me të cilët ndan pushtetin”, shkruan ndër të tjera Kryemadhi në një postim në Facebook.
Kryeministri Rama u mor dje me gazetarët pas përfundimit të seancës plenare, duke i quajtur ata “të paditur, injorantë dhe që merren me thashetheme”, ndërsa të njëjtën gjë bëri edhe sot në një takim me investitorët e huaj, të cilët i rekomandoi mos të takonin gazetarët, sepse, sipas Ramës, pengojnë sistemin tretës.
REAGIMI I KRYEMADHIT:
Edi Rama, i frikësuari më i madh në Shqipëri më kot përpiqet të intimidojë me mënyren e tij të komunikimit prokurorinë apo median. Sharjet dhe fyerjet e tij për gazetarët edhe në qofshin përpjekje për të tërhequr vëmendjen nga seanca e turpit që u zhvillua dje prapë janë shenjë e qartë e frikës së tij dhe banditëve me të cilët ndan pushtetin. Votat e krimit që blenë dje dhe përfshirjen e ish ministrit në trafikun ndërkombëtar të lëndëve narkotike, nuk do të mundin kurrësesi të mposhtin vullnetin e një populli që po qeveriset nga mafia dhe rrezikon të shndërrohet në diktaturën e kanabisit.
